Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 83 Hüküm no: 46 Orijinal metin no: [6a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üsküdar vergisini mukataaya alan Mehmed b. Süleyman’ın hesaplarının incelenmesi Vech-i tezkire oldur ki Sâbıkan nefs-i Üsküdar’ın mahsûlâtıyla ze‘âmetini üç yıla altmış bin akçeye mukāta‘aya tutan Mehmed b. Süleyman’ın fahrü’l-ümenâ Emîn Şemseddin’in defteriyle muhâsebesi görülüp ulûfesi dokuz yüz akçe mezkûr emîne teslîm olunmuş bulunup altı bin akçe daha sâbıkda edâ olunmuş bulunup ve hâliyâ üç bin altı yüz kırk beş akçe dahi (…) (…) teslîm olundukda şimdiki hâlde âmil olanlar Osman b. Gevherdaş ve Resul b. Mustafa (…) hâzırân olup mahsûl-ı mezbûrda zikr olan akçeler ki cem‘an on bin beş yüz kırk (…) emîn-i mezbûr elinden bize bi’t-tamâm teslîm olundu biz dahi alıp kabz ettik deyu ikrârlarını mezkûr ikrâr edicek iltimâsıyla kazıyye sicillâta kayd olundu ve mahsûl-ı mezkûrdan dükkân kirâsına yüz otuz beş akçe teslîm olundu deyu emîn-i mezbûr ikrâr eyledi mevâcib-i ases iki yüz kırk (…) üç abd-i âbık tutulup yüz yetmiş bir akçe harc-ı ma‘kūlleri olup birisi (…) olup mezkûr mahsûlünden elli yedi akçe harcın zâyi‘ olup ve ikisi dahi hapisden ibâkat edip onlara dahi yüz on dört akçe harcın zâyi‘ oldu deyu ikrâr edicek mezbûr Mehmed iltimâsıyla sicillâta sebt olundu. Fî evâhiri Rebî‘ilevvel sene hamse ışrîn ve tis‘a-mi’e. Şuhûdü’l-hâl: Timurhan b. İsmail el-Muhzır ve Kılavuz el-Muhzır ve Seferşah Ağa el-Emîn-i mahkeme, Receb b. Hasan ve gayruhum mine’l-hâzırîn