Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 96 Hüküm no: 83 Orijinal metin no: [9b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil b. İsmail’in suçladığı komşularının beraat etmesi [Vech-i tezkire] oldur ki Karye-i Soğanlık’dan Halil b. İsmail meclis-i şer‘a gelip kızı husûsunda irâd ettiği hükm-i şerîfi ibrâz ettikde hasımları olan Umur b. Musa ve Yusuf b. Mustafa ve Ali b. Yusuf ve Elif bt. ( ), ve Hâce bt. Dânişmend Tayyib nâm kimesneleri ihzâr ettikde ber-mûceb-i şer‘-i kavîm ve kānûn-ı müstakîm teftîş ve tefahhus olundukda mezkûr Halil bühtân edip kulu Durmuş ile müttehemedir deyip evim üzerine ehl-i hıref (…) te‘addî ettiniz dedikde mezkûrûn mukābele bi’l-inkâr eyledikleri sebebden gıbbe’l-acz an ikāmeti’l-beyyine mezkûrân yemîn billâh ettirildikden sonra Mahmud Çelebi b. Umur, Mahmud b. Abdullah ve Ahmed b. Yakub cemâ‘atden hâzırûn olup mezkûrûnların min külli’l-vücûh emânetlerine ve istikāmetlerine örfen kefîl oldukları ecilden bu husûsda berâatlarına hükm olundu. Ba‘dehû kefilleri yemîn dahi ettiler. Şuhûdü’l-hâl: İsa b. İsmail, Bahşayiş b. Hasan, İbrahim b. İsmail, İbrahim b. Ahmed, Çalabverdi b. Kutbeddin ve gayruhum