|
Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 122 Hüküm no: 161 Orijinal metin no: [18a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Koçi ile Boğazkesen hisar erleri arasında bazı köylerin mahsulünün paylaşılmasında anlaşmazlık çıkması
Tafsîl Koçi nâm sipâhi an vilâyet-i Taşköprü Tafsîl oldur ki Mezkûr Koçi kal‘a-i Boğazkesen erenlerinden Mehmed ve diğer Mehmed ve Hüseyin ve Ramazan nâm kimesneler ile Gekvize nâhiyesinde Döğercik ve Yayalar ve Arklar ve Virân nâm karyeler mahsûlatı husûsunda olan nizâ‘ için bu cânibe Dergâh-ı mu‘allâdan hükm-i hümâyûn irâd ettikde mütemessilen-leh husamâ meclis-i şer‘a ihzâr olunup teftîşe şurû‘ olundukda mezkûr Koçi zikr olan hisâr erenleri üzerlerine takrîr-i kelimât sizin zikr olan karyeleri ale’s-seviye müşterek tasarruf ederken şimdi bana tasarruf ettirmezsiz dedikde cevâb verip senin bin iki yüz seksen dört akçe hissen Şeyhzâde Mustafa Çelebi’ye sene selâse ve ışrîn ve tis‘a-mi’e Cumâdeluhrâ gurresinde sadaka olunmuşdur hakkın kalmamışdır dediklerinde mezkûr Mustafa Çelebi’nin berâtına nazar olunup zikr olan Virân köyden bin iki yüz seksen dört akçe mezkûr Koçi elinden ve dört yüz akçe Hisâr erenlerinden alınmış bulunup Döğercik ve Arklar ve Yayalar karyesinde hissesi alınmayıp ve alındığı ma‘lûm olmadığın sebebden zikr olan üç pâre karyelerde de hissesi hükm olunup deftere kayd olundu. Fî evâsıtı Cumâdelâhire sene hams ve ışrîn ve tis‘a-mi’e.
Şuhûdü’l-hâl: Turahan b. İsmail, Mehmedî b. Yusuf, İsmail b. Gündüz, Durdu b. Şahim
|