Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 176 Hüküm no: 320 Orijinal metin no: [35b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İshak b. Davud’un ölen babasından intikal eden mirası üvey annesi Eslim bt. Abdullah’ın vermesi Kazıyye oldur ki Ba‘de vürûdi’l-hükmi’s-sultânî ve’l-emri’l-hâkānî li husûsı hâzihi’l-kazıyye işbu temessükü (...) el-hurûf İshak b. Davud meclis-i şer‘a üvey anası Eslim bt. Abdullah’ı ihzâr edip babam fevt olup muhallefâtından bana ait olan hakkım sende kaldı taleb ederim ve hîn-i kısmetde olandan gayri dahi esbâb hıfz etmişsin görülsün dedikde mezkûre Eslim ben senin hissen ne idiğin bilmezin kısmet defteri bulunsun dedikde kısmet eden Dadaylı Ali Fakih ile kısmet defteri getirdilip nazar olunup mezkûr İshak’a babasından yüz altmış altı akçelik muhallefât intikāl etmiş bulundukda mezkûreden taleb olunıcak ben bilmezim deyu cevâb vericek mezkûr Ali Fakih’den suâl olundukda Davud müteveffânın muhallefâtın yazıp cümlesin mezkûreye teslîm edip evinde kodum gitti dedikde mezkûre Eslim dahi an tav‘ Ali Fakih’in kelimâtın tasdîk edip vâkı‘â esbâbı yazıp benim evimde koydu gitti deyicek zikr olan yüz altmış altı akçelik metrûkât mezkûre Eslim’den hükm olundu ve mezkûrenin hîn-i kısmetde sakladığı sini ve sandıkdan dahi mezkûr İshak’a kırk akçe ait olup sebt-i sicil olundu ve sâir muhallefâtına mezkûre Eslim’e yemîn billâh ettirilip berâatına hükm olundu. Fî evâhiri Ramazân sene 925. Şuhûdü’l-hâl: Mürüvvet b. Ahmed, Oruç Haddâd b. Hızır, Veli b. Mürüvvet ve gayruhum