Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 177 Hüküm no: 322 Orijinal metin no: [36a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İddet dönemine uymadıkları için nikahları geçersiz sayılan Hızır Bâli ile Servi Hatun’un tazir olunması ve nikahın yenilenmesi (...) olan Ali Fakih’in Hızır Bâli’yi ve avretini (…) (...) olan Hızır Bâli’nin avretinin nikâhı husûsunda Ali Fakih (...) olan nâhiyesinin müftüsü Efendi Hazretleri bu fakîre Ağa hazretlerinin mektûb-ı şerîfleri [vârid olup] mezkûr Hızır Bâli’ye verdikleri merâmla mazmûnunda Hızır nâm kimesne cânibinden (...) Servi nâm Hâtun (...) nikâh ettirdikden sonra hâliyâ Taşköprü’de nâibü’ş-şer‘ olan Ali Fakih mezkûr Hızır’ı ve avreti aranızda nikâh yokdur deyu muhkem ta‘zîr etmiş imdi gerektir ki tefahhus edip kazıyyeyi onat vechile teftîş edip vâkı‘â mezkûr mezbûreye şer‘ile nikâh ettirdiği şer‘le sübût bulup mevâni‘-i şer‘iyyeden ve örfiyyeden nikâhında nesne yoğsa sıhhat-i nikâha [hükm] edip eline hüccet-i şer‘iyye veresin ve illâ mufassal yazıp arz edesin denildiği sebebden dahi meclis-i şer‘a ihzâr olunup teftîşe şurû‘ olundukda mezkûr Hızır Bâli zikr olan nâib Ali Fakih üzerine mektûb-ı şerîfde tahrîr olunduğu gibi takrîr-i kelimât ettikde mezkûr Ali Fakih cevâb verip ol senin, menkûhumdur deyu (...) ettiğin avretin sâbıkā zevci olan Çalış nâm kimesne sene hamse ve ışrîn ve tis‘a-mi’e Rebî‘ülevveli’nin on beşinci gün düşenbih günü fevt olup ba‘dehû Yakub Fakih izniyle sene hamse ve ışrîn ve tis‘a-mi’e Recebi’nin on beşinci günü Şeşenbi günü nikâh ettirmişsin bu takdîrce nikâh iddet içinde olmuş ola cem‘ olman deyu tenbîh ettiğimden sonra itâ‘at etmeyip cem‘ olduğunuz sebebden ta‘zîr ettim dedikde mezkûr Hızır Bâli fi’l-vâki‘ bu vechile tenbîh olundukdan sonra cem‘ olduk ama ben sahîh-i nikâh benim bilirdim anın için cem‘ oldum lâkin mezkûrenin zevc-i sâbıkı ne gün fevt olup ve ne gün bana nikâh olunduğun bilmezim dedikde udûl-i müslimînden İmâm Şahkulu Fakih b. Abdi ve Koçi b. Hızır ve Şâdi b. Mustafa ve Hasan b. Timurtaş hâzırûn olup fi’l-vâki‘ hâliyâ mezkûrenin zevc-i sâbıkı zikr olan târihde fevt oldu deyu şehâdet ettiklerinden sonra mezbûre avrete nikâh eden Kemal Fakih dahi ihzâr olunup ne gün nikâh ettin deyu suâl olundukda sene hamse ve ışrîn ve tis‘a-mi’e Recebi’nin on beşinci gün Şeşenbi günü ki Koçi Bey’in imecisi günün evvelki gündür Kara Hacı Ali b. Yakub Fakih’den izin mektûbu getirdi ol gün nikâh ettim dedikde mabeyni hesâb olunup dört ay olmuş bulunup iddetden on gün evvel nikâh olunduğu tamâm-ı zâhir ve ma‘lûm olup zikr olan nikâhın adem-i sıhhati azher mine’ş-şems münkeşif olıcak Ali Fakih’in ta‘zîri sahîh bulunup mezkûr Hızır Bâli talebiyle tekrâr yine nikâh olunup mâ-hüve’l-vâki‘ sebt-i sicil olundu. Fî evâhiri Ramazâni’l-mübârek sene 925. Şuhûdü’l-hâl: Osman Fakih b. Halil, Mürüvvet b. Ahmed, Mahmud b. İvaz, Veli b. İlyas, Timurhan b. Hacı Ali, Menteşe b. Aydın ve gayruhum mine’l-hâzırîn