Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 246 Hüküm no: 477 Orijinal metin no: [56b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Silahdar Murad’ın alacağına karşılık Andronikoz b. Manol’un tarlasını satın aldığı Kazıyye Vech-i tezkiretü’l-hurûf oldur ki Silahdar Murad Bey şer‘-i şerîf meclisine Andronikoz b. Manol’u ihzâr edip sende öküz bahâsından iki yüz akçem var senden taleb ederim deyicek mezkûr Andronikoz mukır olup akçe bulamazım öte yokuz (?) demeklik ile ma‘rûf olan tarla ki hadd-i kıblîsi Todora b. Küçük tarlasına müntehîdir hadd-i garbîsi Yani İstamod tarlasına mülâbisdir hadd-i şarkîsi tarîk-i âmla mülâsıkdır hadd-i şimâlîsi Petro’ya muttasıldır hudûd-ı erba‘a içinde olan bir kıt‘a yer ki eşcâr-ı müsmiresi ile iki yüz akçeye mezbûr Silahdar’a Murad’a bey‘ eyledim deyu ikrâr edicek Câbi Pîr Çelebi’ye yirmi akçe resm-i tapu verilip kabûl ettikde mezkûr Murad bey‘[i] kabûl edip deftere sebt olundu. Tahrîren fî evâhiri Muharrem min şuhûri sene 926. Şuhûdü’l-hâl: [İ]skender b. Abdullah, Muhzır Receb, Mustafa b. Abdullah, İskender b. Abdullah, Hamza b. Mütevellî