Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 249 Hüküm no: 485 Orijinal metin no: [58a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mescid vakfından ödünç alan Musa b. Mustafa’nın bezirhanesini rehin verdiği Kazıyye Vech-i tezkiretü’l-hurûf oldur ki Musa b. Mustafa şöyle ikrâr-ı sahîh kılıp dedi ki işbu temessük-i (…) vesîka Hamza Fakih mütevellî olduğu mescidin vakıf akçesinden mûmâ-ileyh Hamza Fakih elinden üç bin dokuz yüz akçe karz-ı hasen alıp ve beş yüz akçe dahi kumaş bahâsından bi’l-cümle vakf-ı mezbûra cem‘an dört bin dört yüz akçe ki râyici ve Osmânî’de borcum olup semen-i mezbûr târih-i kitâbdan sene-i kâmile tamâm olunca mü’ecceldir ve nefs-i kasaba-yı Üsküdar’da olan bezirhânem ki beyne’l-cîrân müte‘âref olduğu için tahdîdden müstağnîdir ma‘a fîhâ mine’l-alîl ve’l-kesîrdir meblağ-ı mezkûr için rehin edip zikr olan bezirhâneyi Mevlânâ Süleyman b. İvaz vekâleten kabz etti deyu ikrâren sahîhan şer‘iyyen musaddikan min kıbeli’l-vekîli’l-mezbûr ve meblağ-ı mastûra Elhâc Mustafa b. İvaz el-Kasab ve Mustafa b. Abdullah kefîl bi’l-mâl olup gıbbe’l-iltimâs tahrîr-i vesîka olunup yedi hâmiline vaz‘ olundu ki vakt-i hâcetde temessük edine. Cerâ zâlike ve hurrire fî evâsıtı Muharremi’l-harâm li sene sitte ve ışrîn ve tis‘a-mi’e. Şuhûdü’l-hâl: Cemal ve Kasım ve Hoca Abdül b. Yahşi ve Şaban Fakih b. Ramazan