Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 267 Hüküm no: 517 Orijinal metin no: [64a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîri b. Sevindik’in parasını mudârebeye veren Eymir b. Çepni’nin beraat etmesi Kazıyye Vech-i tezkiretü’l-hurûf oldur ki Şile kazâsında mütemekkin olan Pîri b. Sevindik şer‘-i şerîf-i Muhammedî meclisine Eymür b. Çepni’yi ihzâr edip şöyle takrîr-i da‘vâ kılıp dedi ki sâbıkā mudârebeye verdiğin bin akçe sefer üzere giderken denizde helâk olup zikr olan meblağ-ı mezkûru benden hilâf-ı şer‘ aldın deyicek mezkûr Eymür b. Çepni mukābelede cevâb verip dedi ki zikr olan meblağ-ı mezkûru mudârebeye verdim idi ama helâk olduğu seferde hüccet ettim idi hâliyâ İslambol kadı[sı] muvâcehesinde mezkûr Pîri ile murâfa‘a olup bana hüccetime şâhid taleb olup mezkûru Pîri inkâr ettikde udûl-i müslimînden şâhidler şehâdâtıyla meblağ-ı mezkûr mezbûr Pîri’den bana hükm olundu deyicek mezkûr Pîri mezkûr Eymür’ün ikrârına mukır oldukda İslambol kadısının hükmü lâhık olduğuyla mezkûr Eymür b. Çepni’nin bu hus[ûs]dan berâat[ine] hükm olunup deftere sebt olundu. Tahrîren fî gurre-i Rebî‘ilevvel min şuhûri sene 926. Şuhûdü’l-hâl: Timurhan b. İsmail, Kılavuz b. Aslıhan, Ali b. Hamza, İlyas b. Abdullah ve gayruhum