Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 351 Hüküm no: 708 Orijinal metin no: [91a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Huri bt. Hamza’nın ortak evlerini ölen kocasının ödünç karşılığında İbrahim Ağa Vakfı’na rehin verdiği Vech-i tahrîr-i hurûf oldur ki Merhûm İbrahim Ağa evkāfının mütevellîsi olan Mustafa b. Abdullah, Hûri bt. Hamza nâm hâtun kişi[yi] meclis-i şer‘a hâzıra kılıp hâliyâ nefs-i Üsküdar’da Bulgurlu mahallesinde müteveffâ olan zevcin Koca Ebri’nin evi ki ma‘lûmetü’l-hudûddur inde ahâlîhâ ve cîrânihâ bize beş yüz elli akçeye rehindir dedikde mezbûre Hûri bi’l-inkâr cevâb vericek udûl-i müslimînden Mevlânâ Sinan Halife b. Evhad ve Dellâk Hızır b. Abdullah mütevellî-i mezbûrun sıdk-ı da‘vâsına mutâbık şehâdet-i şer‘iyye kıldıklarında şehâdetleri ba‘de’t-ta‘dîli’ş-şer‘î hayyiz-i kabûlde vâki‘ olup sıhhat-i rehne hükm olundukdan sonra mâ vaka‘a mütevellî-i mezbûrun talebiyle sebt-i sicil olundu. Tahrîren fî evâsıtı şehri evveli’l-Cumâdeyn sene 927. Şuhûdü’l-hâl: Hamza b. Abdullah er-Râcil ve Muharrem b. Yunus ve İbrahim b. Gündüz ve gayruhum