Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 357 Hüküm no: 719 Orijinal metin no: [93b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gebze kadısına Mustafa Dede’nin arpalığına müdahalenin önlemesi hakkında gönderilen fermanın sureti Sûret-i hükm-i pâdişâhî Mefharü’l-kudât ve’l-hükkâm ma‘denü’l-fazl ve’l-kelâm Mevlânâ Gekvize kadısı -dâme fazluhû- tevkî‘-i refî‘-i hümâyûn vâsıl olıcak ma‘lûm ola ki hâliyâ merhûm ve mağfûrün-leh Şeyhzâde ( ) -nevvera’llâhu merkadehûnun- oğlu işbu dârende-i fermân-ı vâcibü’l-iz‘ân fahr-i erbâbü’l-kalem Mustafa Dede -zîde tevfîkihî- cânibinden Dergâh-ı mu‘allâma şöyle arz olundu ki Nerdübanlı ve Virân nâm arpalık timârının rusûm-ı serbestiyesine hâricden bazı kimesneler dahl ederler imiş imdi arpalık timâr serbest olmak kānûn-ı mukarrerdir buyurdum ki müşârun-ileyhin arpalık timârının resm-i cürm-i cinâyetine ve kul ve câriye müjdegânîsine resm-i arûsânesine sancakbeyi cânibinden ve subaşılık ve âdemlerinden ve çeribaşlarından ve gayriden hiç ahadı dahl ettirmeyesin ve dahl edip rusûm-ı serbestiyesinden ne mikdâr nesne almışlar ise ve ne mikdâr nesne alındığı sâbit ve zâhir olursa her kimden müteveccih olurlar ise hükm edip bî-kusûr alıveresiz bir türlü dahi [te‘allül] eylemeyesiz ve ba‘de’n-nazar bu hükm-i şerîfi elinde ibkā edesiz şöyle bilesiz alâmet-i şerîfe i‘timâd kılasız. Tahrîren fi evâili şehri Cumâdelâhir sene seb‘a ve ışrîn ve tis‘a-mi’e. Be makām-ı Kostantiniye