Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 364 Hüküm no: 734 Orijinal metin no: [96b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todora b. Kosta’nın hayatta iken evini Selman Ağa Vakfı mütevellisi Ali b. Abdullah’a satması Kazıyye Vech-i tahrîr oldur ki Süheyl b. Abdullah nâm mütevellî meclis-i şer‘a hâzır gelip karye-i Çengel’de fevt olan Todora b. Kosta’nın zevcesi olan Erini bt. Yorgi’[yi] ihzâr edip şöyle takrîr-i merâm kılıp dedi ki bizden sâbık merhûm Selman Ağa’nın vakfına mütevellî olan Ali b. Abdullah karye-i mezbûrda merkūm Todora sâkin olduğu evin bin üç yüz akçeye satın almış bir yıla denlü yüz yetmiş akçeye kirâya vermiş el-ân taleb ederim deyicek mezkûre Erini inkâr eyledi gıbbe’l-inkâr mezkûr Süheyl’den da‘vâsına muvâfık beyyine taleb olundukda Abdül Fakih b. Yahşi ve Mahmud Fakih b. İshak hâzırân olup dediler ki biz şâhidleriz ve şehâdet dahi ederiz ki mezbûr müteveffâ Todora evini hâli hayâtında iken mütevellî Ali’ye bin üç yüz akçeye sattı bir yıla denlü sâkin olmak yüz yetmiş akçeye kirâya verdi deyu ol bâ‘isden mezbûr ev merkūm mütevellî Süheyl’e hükm olunup talebiyle deftere sebt olundu. Tahrîren fî evâili Safer sene 927. Şuhûdü’l-hâl: Resul Fakih b. Durak ve Kılavuz b. Aslıhan ve gayruhumâ