Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 365 Hüküm no: 736 Orijinal metin no: [97a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şirmerd Hoca b. Abdullah’ın, ölen Ali b. Koçi’den alacaklı olduğu Kazıyye Vech-i tahrîr oldur ki Şîrmerd Hoca b. Abdullah meclis-i şer‘a hâzır gelip bilesince nefs-i Üsküdar (...) müteveffâ olan Ali b. Koçi’nin yetîmlerine kıbel-i şer‘den vasî olan Ali Fakih b. [İbrahim] ’i ihzâr edip üzerine şöyle takrîr-i merâm kılıp dedi ki merhûm müteveffâ Ali b. Koçi’de karz-ı hasen verilmiş beş yüz akçem vardı öldü üzerinde kaldı deyicek mezkûr vasî Ali Fakih inkâr eyledi gıbbe’l-inkâr ve’l-istişhâd mezkûr Şîrmerd Hoca’nın da‘vâsına muvâfık beyyine taleb olundukda udûl-i müslimînden Musa b. İbrahim ve diğer Musa Yeniçeri b. Abdullah hâzırîn olup dediler ki biz şâhidleriz ve şehâdet dahi ederiz ki mezkûr müteveffâ [Ali] b. Koçi’nin mezbûr Şîrmerd Hoca’ya karz-ı hasenden beş yüz akçe deyni vardı öldü üzerinde kaldı deyu ol bâ‘isden meblağ-ı mezbûr merhûm Ali b. Koçi’nin metrûkâtından hükm olunup mesfûr Şîrmerd Hoca talebiyle deftere sebt olundu. Tahrîren fî evâsıtı Safer sene 927. Şuhûdü’l-hâl: Timurhan b. İsmail ve Mahmud Yeniçeri b. Abdullah ve Hacı b. Balaban ve gayruhum