Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 463 Hüküm no: 865 Orijinal metin no: [122a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali ve Emir’in ölen Aziz b. Seydi Ali’nin akrabaları olduğu Sebeb-i tahrîr-i kalem budur ki Bundan akdem karye-i Samandıra’da Aziz b. Seydi Ali fevt olup nefs-i Üsküdar’da mütemekkin olan Mevlânâ Utul Hâtun’u zevi’l-erhamlığını hâtunu tarafından Utul isbât edip bi hasebi’ş-şer‘i’l-kavîm merhûm azizin metrûkâtından ba‘de ihrâci’d-düyûn ve’l-vasiyye ve tekfîn ma‘a techîz bâkī olan meblağ-ı mezkûr Utul’a teslîm olundukda el-hâletü hâzihî kazâ-yı Şile’de karye-i Şeyhler içinde mütemekkin olan Ali ve Emir meclis-i şer‘de mezkûr Utul muvâcehesinde usûbete da‘vâsını ettikde sıdk-ı da‘vâlarına muvâfık beyyine taleb olunup udûl-i müslimînden İbrahim b. Mürsel ve Osman Fakı ve Hamza Fakı ve İvaz b. Hamza hâzırûn olup edâ-yı şehâdet edip dediler ki işbu Ali ve Emir, Süleyman’ın oğludur ve Süleyman dahi Ahmed’in oğludur ve mezbûr müteveffâ Aziz Seydi, Ali oğludur ve Seydi Ali, Ahmed’in oğludur deyu vech-i meşrûh üzere mezkûrun şehâdetleri hayyiz-i kabûlde vâki‘ olup mezkûrân Ali ve Emir’in müteveffâ Aziz’in asabesi olduğuna hükm olunup sebt-i sicil olundu. Cerâ zâlike fî evâili Rebî‘ilâhir an sene 927. Şuhûdü’l-hâl: Kara Süleyman ve Âdil ve Nâzır b. Yahşi ve Ali v. Turhan ve Bekir ve Mustafa