Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 466 Hüküm no: 874 Orijinal metin no: [123b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Piri b. Abdullah’ın ölen kayınpederinin mirasından eşinin hissesini istemesi Vech-i tezkiretü’l-hurûf budur ki Nefs-i Gekvize’de Pîri b. Abdullah ki avretinin vekîlidir kad tebeyyene vekâletehû inde’ş-şer‘ meclis-i şer‘a hâzır olup bile kasaba-i Üsküdar’dan Tuti bt. Abdullah[’ı] ihzâr edip mezkûr Pîri takrîr-i merâm ve tebyîn-i kelâm kılıp eyitti ki avretimin babası Kara Kasım fevt oldu ba‘zı esbâbı kaldı taleb ederim te‘allül eder vermez deyicek mezbûre Tuti’ye suâl olundukda mukābelede cevâb verip eyitti ki mezkûr zevcim Kara Kasım bana talâk verip hîn-i talâkdan bir akçem ve bir habbem kalmadı dedi deyicek sıdk-ı cevâbında muvâfık beyyine taleb olundukda udûl-i müslimînden Mustafa b. Abdullah ve Hamza [b.] Abdullah edâ-yı şehâdetler eylediler bi’l-istişhâd ba‘de’t-tezkiye ve’t-ta‘dîl hayyiz-i kabûlde vâki‘ oldukda fasl-ı husûmete hükm olunup deftere sebt ve sicil olundu. Tahrîren fî evâhiri âhiri’l-mürecceb sene seb‘a ışrîn ve tis‘a-mi’e. Şuhûdü’l-hâl: Memişah b. Aslıhan ve Mustafa b. Kasım ve Mehmed b. Süleyman ve Kılavuz b. Aslıhan ve gayruhum mine’l-hâzırîn