Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 483 Hüküm no: 899 Orijinal metin no: [130b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üsküdar emininin zaptettiği, ölen zimmînin bozahane hissesinin Samur b. Aleksi’ye verilmesi Sebeb-i tahrîr-i hurûf oldur ki Nefs-i Üsküdar’da emîn olan Timurhan b. İsmail meclis-i şer‘a hâzır gelip bile İstanbul’dan Samur b. Aleksi ihzâr edip Timurhan takrîr-i merâm ve tebyîn-i kelâm kılıp eyitti ki (…) nâm zimmî fevt olup rızkı beylik oldu kasaba-i mezkûrede Mehmed Paşa ihdâs ettiği bozahâneden bir hissesi kaldı (…) için zabt ettim deyicek mezkûr Samur mâni‘ olur (…) eyledi mezkûr Samur’a suâl olundukda mukābilde cevâb verip eyitti ki bu zikr olan bozahâne hissesini müteveffâ-yı mezkûrdan üç yüz akçeye bey‘ ederim deyicek sıdk-ı kelâm üzere beyyine taleb olundukda udûl-i müslimînden Hızır b. Kudret ve Ömer b. Seydi gelip mezbûr Samur’un kavline muvâfık şehâdet eylediler şehâdetleri ba‘de’t-tez[kîye] ve’t-ta‘dîl hayyiz-i kabûlde vâki‘ olup mezkûr hisse mezbûr Samur’a hükm [olunup] deftere sebt ve sicil olundu. Tahrîren fî evâhiri Recebi’l-mürecceb sene seb‘a ışrîn ve tis‘a-mi’e. Şuhûdü’l-hâl: Mahmud b. Ali ve İbrahim b. Abdullah ve Kılavuz b. Aslıhan ve Mustafa b. Abdullah gayruhum mine’l-hâzırîn ve’n-nâzırîn