Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 62 Hüküm no: 36 Orijinal metin no: [5a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mustafa b. Abdullah’ın Resul b. Lütfü’ye arpa ticaretinden borçlu olduğu Kazıyye oldur ki Resul b. Lütfullah meclis-i şer‘de Hacı Mustafa b. Abdullah mahzarında takrîr-i da‘vâ edip eyitti ki: Mezbûr Hacı Mustafa ile üç yüz akçelik arpa alıp sattık, tamâm bir yıla değin iştirâk üzere meblağ-ı mezbûr [ile] bi’l-iştirak dâima arpa alıp sattık, âhar senede kat‘an bana bir akçe ve bir habbe rıbh göstermedi ve re’s-i mâlın dahi yüz elli akçesin verdi, bâkīsin ben mu‘âmeleye aldığımız kimesneye edâ eyledim, dedikde ikrâr edip mezbûr Hacı Mustafa vâkı‘â vech-i meşrûh üzere üç yüz akçelik arpa bir yıla murâbaha eyledik, ammâ mahsûlünü ve re’s-i mâlını mezbûr ile bi’l-münâsafa üleşdik, dedikde gıbbe’l-inkâr mezbûr Hacı Mustafa’dan beyyine taleb olundukda beyyineden âciz olup talebiyle mezbûr Resul’e yemîn tevcîh olunup elini mushaf-ı şerîfe vaz‘ edip yemîn billâh edicek zikr olunan res-i mâlın yüz ellisi mezbûr Hacı Mustafa’dan hükm olunup talebiyle deftere sebt olundu. Tahrîren fî evâili Ramazâni’l-mübârek sene 930. Şuhûdü’l-hâl: Mevlâna İsa b. Fazl, Hüseyin b. Sinan, Mehmed b. Süleyman, Kulağuz b. Aslıhan, Receb b. İvaz ve gayruhüm.