Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 63 Hüküm no: 38 Orijinal metin no: [5a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi’nin mirasçılarının tespit edilmesi Vech-i tezkiretü’l-hurûf budur ki Silahdâran zümresinden Nebi b. Ahmed meclis-i şer‘de Timurhan b. İsmail mahzarında takrîr-i müdde‘â kılıp eyitti ki sâbıkan mahrûse-i Kostantıniyye’de babam fevt olup nefs-i Üsküdar’da mahalle-i Selman Ağa’da olan Hergeleci Mustafa b. Bahadır evinde bir sakar at ve kula katır ve bir çadır ve semer, çul ve bazı dahi esbâbı kaldı, diye taleb ettikde mastûr Timurhan neden ma‘lûm baban idiği dedikde Atala kadısının nâibi olan Davud b. Ali Fakih nakıl îrâd eyleyip ve naklin muhassıllı mezbûr Nebi ve Pazarlı ve Ali müteveffâ Ahmed Çelebi’nin oğullarıdır ve Safiye ve Ayşe ve Suğra ve Rukıyye bt. sulbiyyeleridir ve Hûri bt. İbrahim Fakih zevcesidir. Merhûm müteveffâ Ahmed Çelebi’nin muhallefâtı cihet-i irsle mezkûrelere intikāl eder ve bunlardan gayrı vâris yokdur, bunlara münhasırdır diye udûl-i müslimînden el-Hâc Sinan b. İbrahim Fakih ve Eymirşah b. Fevzi Bey şehâdet eyleyip verâsetin hükm etdikden sonra yedine nakıl verip bu fakīre irsâl eylemişler, ba‘de mâ nazara ilâ mefhûmihî şuhûd tarîkıyle taleb olundukda el-Hâc Hasan b. Melek Kadı ve Ahmed b. Hasan şehâdet edip eyittiler ki, biz şâhidleriz şehâdet dahi ederiz bu nakıl mezbûr kadı’nın naklidir, dedikde ba‘de’t-tezkiye ve’t-ta‘dîl hayyiz-i kabûlde vâkı‘ olup verâset mukarrer kılınıp bin otuz sekiz akçe teslîm olundu. Tahrîren fî evâili Ramazâni’l-mübârek sene selâsîne ve tis‘a mi’e. Şuhûdü’l-hâl: Nazar b. Yahşi, Hoca Süleyman b. Mehmed Fakih, Süleyman b. Kassâb Mustafa, Halil b. Hasan, Mehmed b. Karagöz, Mehmed ve gayruhüm mine’l-hâzırîn.