Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 70 Hüküm no: 59 Orijinal metin no: [7a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsa b. İsmail’in kullandığı yerlerin Kapıcıbaşı Mehmed Ağa’ya ait olduğu Sebeb-i tahrîr oldur ki Âsitâne-i keyvân-rif‘at Kapıcıbaşı Mehmed Ağa’nın âdemisi olan Hasan b. Abdullah karye-i Aslıhan’dan İsa b. İsmail’i şer‘-i şerîf meclisine ihzâr edip dedi ki, hâliyâ taht-ı tasarrufunda zirâ‘at eylediğin İskender Pınarı ve Gök Pınarı demekle ma‘rûf ma‘lûmetü’l-hudûd yerler Defter-i Hâkānî’de karye-i mezbûrede üzerimize hâssa bir çiftlik kayd olunmuşdur, dedikde sâlifü’z-zikr İsa dahi bi’l-muvâcehe inkâr edip beyyine taleb olundukda udûl-i müslimîn ve sikāt-ı muvahhidînden Bahşayiş b. İsa ve Ahmed b. Yakup mezbûrun da‘vâsına mutâbık ve muvâfık zikr olan arz çiftlikden idiğine şehâdet-i şer‘iyye edip ba‘de’t-tezkiye ve’t-tahlîfi’l-âdî hayyiz-i kabûlde vâkı‘ olup ber-mûceb-i şer‘-i şerîf Defter-i Hâkānî’de muvâfık olup ve ber-mûceb-i emr-i pâdişâhî hükm olunup sebt-i sicil olundu. Tahrîren fî evâili Zilhicce sene 930. Şuhûdü’l-hâl: Bâli b. Aslıhan, Abdi b. Mustafa, Bayezid b. İvaz, İbrahim b. Ahmed, Ahmed b. Mahmud ve gayruhüm mine’l-müslimîn.