Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 73 Hüküm no: 68 Orijinal metin no: [8a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ferahnaz bt. Abdullah’ın evini eşyalarıyla vakfetmesi Kazıyye oldur ki Pîri b. Bûhıye meclis-i şer‘de ba‘de mâ sebete vekâletühû an kıbeli zevcetihî Kaya bt. Abdullah bi-mâ hüve tarîkı’s-sübût şer‘an Ferahnaz bt. Abdullah mahzarında şöyle takrîr-i müdde‘â kılıp eyitti ki, mezbûre Ferahnaz nefs-i Üsküdar’da merhûm Selman Ağa mahallesinde olan mülk çatma ev ve zamîme hayatıyla taşdan ve toprakdan binâ olunmuş ev ve bir kileri kuyusuyla ve yanında asma bağıyla yanında olan bağçesinden gayrısını zevceme ve evlâdına ve evlâd-ı evlâdına mâ tenâselû ve te‘âkabû vakf eyledi ve teslîm eyledi ve ba‘de’l-inkırâz Geredelü mahallesi mescidi imâmına ta‘yîn eyledi, dedikde gıbbe’l-inkâr ve’l-istişhâd Evrenos b. Yahşi ve Mustafa b. Turahan müdde‘â-yı muharrere-i mukarreresine muvâfık şehâdet-i şer‘iyye edâ edip gıbbe’t-tezkiye ve’t-tahlîf hayyiz-i kabûlde vâkı‘ olup zikr olunan evlerin hududuyla vakfiyyetine hükm olunup mezbûr Pîri talebiyle deftere sebt olundu. Tahrîren fî evâili Recebi’l-mürecceb sene 930. Şuhûdü’l-hâl: Ali b. Ahmed, Ahmed b. Doğan, Yusuf b. Abdullah, Mevlâna İsa b. Fazlullah, Musa b. el-Hâc Mustafa, Mehmed b. Süleyman ve kāid-i cüyûşü’l-müslimîn Hızır Çavuş b. Mustafa Bey ve gayruhüm mine’l-hâzırîn.