Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 80 Hüküm no: 92 Orijinal metin no: [10b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bir yeniçerinin eşyalarının çalınması Vech-i tahrîr-i sicil budur ki Dergâh-ı a‘lâ yeniçerileri zümresinden Mehmed nâm yeniçerinin bazı esbâb ve akçesi sirkat olunup fahru’l-ekâbir ve’l-e‘âzım yeniçeri ağası Mustafa Ağa hazretleri dâme ikbâluhûnun Gekvize kazâsında karye-i Yenice’de bir kulu tutulup sirkat olan esbâbdan iki gümüş kadeh bulunup sâhibine teslîm olundukdan sonra gulâm-ı mezbûr şer‘-i şerîf mahfiline ihzâr olunup tefahhus olundukda işbu vechile ikrâr ve i‘tiraf edip dedi ki; Ağzıçalık demekle ma‘rûf bir kimesne sâbıkda benim ile âşina olup anın tahrîki ile mezkûr Mehmed’in üç bin dört yüz akçe ve bir gümüşlü kılıç ve iki gümüş kadeh ve sekiz dâne don ve gömlek sirkat edip zikr olan esbâbdan iki kadehi ben aldım ve sâiri Ağzıeğri’de kalıp karye-i mezbûre kurbunda çadır ile sâkin olup bir gün gece ile bir düğüne varıp dülbend sirkat eder iken bazı kimesneler duyup beni tutup Üsküdar cânibine gelir iken düğüne gelen kimesnelerden bazısına: Beni ne tutarsız beni tahrîk edip sirkaya gönderen mezkûr Ağzıçalık’dır, hattâ nice koyun ve sığır yiyip boynuzların çadırı kurbunda koduk, deyicek ol kimesneler dahi vech-i meşrûh üzere bulup mezkûr Ağzıçalık’ı bend edip ve bazı koyuverip ve sâniyen geri bend edip beni efendime teslîm eyleyin dedim, dedikde mazanna olan eşhâsı meclis-i şer‘a ihzâr edip tefahhus olundukda bağladıklarına ikrâr edip ammâ sârık mı değil midir ilmimiz olmadığı sebebden ve izn-i kadı dahi olmadığı ecilden koyuverdik, dedikleri sebt-i sicil olundu. Tahrîren fî evâsıtı Zilka‘deti’ş-şerîfe sene selâsîne ve tis‘a mi’e. Şuhûdü’l-hâl: Mevlâna İsa Fakih b. Fazlullah, Mevlâna Receb b. Seydi, Timurhan b. İsmail, Kulağuz b. Aslıhan ve gayruhüm mine’l-müslimîne’l-hâzırîn.