Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 102 Hüküm no: 159 Orijinal metin no: [17a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Demirci Resul’ün eşi Ümmi ve çocuklarının, kendilerine miras kalan mallar konusunda anlaşmaları Sebeb-i tahrîr-i sicil budur ki Nefs-i Üsküdar’da müteveffâ olan merhûm Resul Haddâd’ın ibni Ali asâleten ve binti Emine’nin vekîl-i şer‘îsi Davud b. Mehmed meclis-i şer‘de hâzırân geldiklerinde merhûmun zevcesi Ümmi bt. İlyas mahzarında takrîr-i müdde‘â kılıp eyittiler ki: Merhûm babamızdan bi-tarîkı’l-irs intikāl eden evi içinde olan kuyusu, eşcâr-ı müsmiresi ve gayr-ı müsmiresiyle tevâbi‘ ve levâhıkıyla iki bin altı yüz râyicü’l-vakt akçeye bey‘ eyledin, dediklerinde mezbûre Ümmi dahi bi’l-muvâcehe cemî‘ mâ-akarra bihîsinde tasdîk eyledikden sonra tebyîn-i müdde‘â kılıp eyitti ki, merhûm babanız fevt olup zimmetinde mehr-i müeccelimden bin akçem kaldı, dedikde mezkûrân inkâr edicek meblağ-ı mastûr aynı ile hükm olunup ve merhûmun muhallefâtından bi-tarîkı’l-irs bana müntakıl olan esbâbdan ve hıssesinden doksan iki akçe ve sagîre kızı Narinşah hıssesinden dört yüz doksan iki akçe alıp sizlere altı yüz on altı akçe bi’t-tamâm edâ eyledim, dedikde mezbûrân dahi meblağ-ı mezbûru aldık, kabz eyledik husûs-ı kazıyyye[de] aslâ ve kat‘an da‘vâmız olmaya ve illâ ınde’l-hukkâm nâ-mesmû‘ ola, deyicek talebiyle sebt-i sicil olundu. Tahrîren fî evâhıri Saferi’l-muzaffer sene 931. Şuhûdü’l-hâl: Sinan Halife el-imâm, Ramazan Halife, Mehmed b. Süleyman ve gayruhüm.