Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 183 Hüküm no: 261 Orijinal metin no: [34b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Paşayiğit’in borç ve alacak listesi Tafsîl budur ki Karye-i Reisli’de vefât eyleyen Paşayiğit’in dâyinleri olup isbât-ı mevt eden kimesneleri beyân eder ve zikr olunur. Tahrîren fî evâhıri Şa‘bâni’l-mu‘azzam sene 930. Karye-i Deresekili’de Mahmud nâm kimesneye Ça[vuş] Hamza kefîl olup iki bin iki yüz akçe kıymetli câriye bahâsından cümle vârisler ikrâriyle verildi. Yenicehisar’dan Üveys b. Yusuf beş yüz akçe taleb eyledikde karz-ı hasenden alınmış imiş. Karye-i Ağviran’dan Hacı Muhabbet yüz akçe taleb eyledikde. Karye-i Depesekili’den Evhad nâm kimesne öküz bahâsından beş yüz akçe taleb eyledikde geri kendi öküzü teslîm olundu. Tahrîren fî târihi’l-mezbûr. Mezbûr karyeden Mahmud nâm kimesne iki yüz akçe taleb eyledikde karz-ı hasenden olup. Karye-i Dudullu’dan Çetmizâde Emir yedi yüz akçeyi taleb eyledikde bir camus ineği alıp kabz eyledi. Mezkûr karyeden Durali öküz akçesinden bin beş yüz akçe taleb eyledikde Mustafa ve Veli ibneyy-i Köseç şehâdetleriyle ve Emir b. Mustafa şehâdetiyle teslîm olundu, oğlu Muharrem yedinden. Bulgurlu’dan Mutaf Fakih bin iki yüz akçe taleb eyledikde mükâteb olan gulâm teslîm olunmuş. Ve Aşık bin altı yüz akçe taleb eyledikde bir camus tosunuyla ve iki kara sığır danası verilip. Ve Kara Memi iki yüz yetmiş akçe karz-ı hasenden deyni olup. Davud Daşdemüroğlu bin ikiyüz elli akçe karz-ı hasenden olup teslîm olundu. Ve Çavuş Hayreddin altı yüz akçe bir çift camus öküzleri bahâsından bâkī kalıp taleb olundukda meblağ-ı mesfûr teslîm olundu. Karye-i Reisli’den Kara Lütfullah dört yüz akçe taleb eyledikde Ve Neccar Ahmed b. Abdullah ücret-i neccârlıkdan beş yüz akçesi olup cümle ikrâriyle verildi. Ve karye-i Reisli’den Şîrmerd öksüzüne iki yüz elli akçe deyn olup teslîm olundu. [35a] Bu mecmû‘a meclis-i şer‘de şâhid kayd olunan kimesneleri beyân eder ve zikr olunur: Musa Fakih b. Kutbeddin, Yeniçeri Ali b. Abdullah, Hacı Muhabbet b. İsmail, Hayri b. Yeniçeri Ali, Şah Mehmedî b. Hüseyin, Veli Cüllâh b. Burhan b. Hasan, Musa b. Nebi, Baş b. Hasan, Kulağuz b. Aslıhan ve gayruhüm mine’l-müslimîn