Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 188 Hüküm no: 271 Orijinal metin no: [37b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çalapverdi b. Hasan’ın mîrîye borçlu olduğu Kazıyye budur ki İstanbul ma‘berinde vâkı‘ olan hâdis peremeleri sene ihdâ ve selâsîne ve tis‘a mi’e tahvîlinde iştirâk üzere mukāta‘aya tutan Çalapverdi b. Hasan ve Mehmed b. İsa şer‘-i şerîf meclisine hâzırân gelip mezkûr Çalapverdi b. Hasan işbu vechile ikrâr-ı sahîh ve i‘tiraf-ı sarîh kılıp eyitti ki, tahvîl-i mezbûrdan mâl-ı mîrîye dokuz bin yüz altmış akçe deyni vardır edâsına kādir değilim, ammâ hâliyâ Bulgurlu mahallesinde vâkı‘ olan ulvî ve süflî ma‘lûmetü’l-hudûd olan mülk evimi tevâbi‘i ve levâhıkı [ve] eşcâr-ı müsmiresi ile işbu hâmilü’l-hüccet Mehmed b. İsa’ya târih-i hâze’l-kitâbdan dört yıla değin altı bin akçeye bey‘ bi’l-vefâ ile bey‘ eyledim ve bâkī üç bin yüz altmış üç akçe Çalapverdi mezbûrun hâtunu Hondi bt. Reis kefîl bi’l-mâl olduktan sonra mezkûr Mehmed b. İsa mezbûr Çalapverdi’nin mîrî için dokuz bin yüz altmış üç akçe deyninin mîrîye edâsını kabûl ve iltizâm eyleyip alâ mâ-cerâ temessük talebiyle işbu vesîka ber-sebîl-i temessük yedine vaz‘ olundu ki vakt-i hâcetde ihticâc edine. Cerâ zâlike ve hurrire fi’l-yevmi’s-sâlis min şehri Recebi’l-mürecceb sene erba‘ ve selâsîne ve tis‘a mi’e. Şuhûdü’l-hâl: Timurhan b. İsmail el-emîn, Hüseyin b. Ali, Burhan b. Hasan, Receb b. Mahmud Fakih, Hamza b. Şaban, Hüseyin b. Hasan, Hamza b. Abdullah ve gayruhüm mine’l-hâzırîn. [38a] boş sayfa [38b] boş sayfa