Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 230 Hüküm no: 367 Orijinal metin no: [53b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rus asıllı kaçak kölenin sahibine teslim edilmesi Vech-i tahrîr-i sicil budur ki Karye-i Ağviran’dan Musa nâm bir asferü’l-levn, eftehu’l-hâcibeyn, ganemü’l-ayneyn, kāimü’l-enf, Rûsiyyü’l-asl kösecü’l-lihye, evsatu’l-kāme başına ak külâh ve eğinine kır aba ve köhne gök kaftan ve ayağına çarık giyer Rûsiyyü’l-asl abd-ı âbıkın gurre-i Ramazânın dördüncü gününde yevmü’l-erba‘ada tutup Çavuş Hayreddin âdemisi Mahmud’a teslîm olunup nafakası ve hıfzı için yevmî iki akçe takdîr olundu. Tahrîren fî evâsıtı Ramazâni’l-mübârek sene ihdâ ve selâsîne ve tis‘a mi’e. Şuhûdü’l-hâl: Mehmed b. Süleyman, İvaz b. Musa, Memi b. İskender, Süleyman b. Yusuf ve gayruhüm. Mezkûr [u] mevsûf abd-ı âbıkın müddet-i örfiyyesi tamâm olup mirâren mezâd olunup bin yüz elli akçeye bey‘ olunup iki yüz akçe nafaka yüz elli müjdegânesine ve doksan ca‘lına ve on dört akçe iki sicillâta cem‘an üç yüz elli dört akçe harc olup bâkī yedi yüz doksan altı akçe Çavuş Hayreddin’e emânet konulup sebt-i sicil olundu. Tahrîren fî 18 Zilhicce sene 931. Şuhûdü’l-hâl: Kulağuz b. Aslıhan, Hacı Hüseyin b. Ahmed, Memi b. Süleyman ve gayruhüm.