Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 236 Hüküm no: 380 Orijinal metin no: [55b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaçak kölenin satılması Vech-i tahrîr-i sicil budur ki Bostan oğlanlarından Hüseyin nâm kimesne meclis-i şer‘a bir asferü’l-levn, mütevassıtu’l-hâcibeyn, ezraku’l-ayneyn, mültehî, başına siyah takye ve eğinine boz aba ve ayağına köhne âsumânî çakşır ve pabuç giyer abd-ı âbıkı tutup fahru’l-a‘yân Çavuş Hayreddin âdemisi Ahmed b. Abdullah’a teslîm olunup nafakası ve hıfzı için yevmî iki akçe olunup sebt-i sicil olundu. Tahrîren fî 23 Zilhicce sene 931. Şuhûdü’l-hâl: Hoca Abdullah b. Yahşi, Memi b. Süleyman ve gayruhümâ. Mezkûr [u] mevsûf abd-ı âbıkın müddet-i örfiyyesi tamâm olup mirâren mezâd olundukdan sonra nefs-i Üsküdar’dan Timurhan b. İsmail’e bin yüz altmış akçeye bey‘ olunup iki yüz akçe nafakasına ve doksan akçe ca‘lına ve altmış akçe müjdegânesine ve on dört akçe iki sicillâta cem‘an üç yüz altmış dört akçe harc [olunup] bâkī yedi yüz doksan altı kalıp Çavuş Hayreddin Bey’de emânet konulup sebt-i sicil olundu. Tahrîren fî 24 âhıri’r-Rebî‘ayn sene 932. Şuhûdü’l-hâl: Hüsam Bey b. Abdullah, İskender b. Abdullah, Berber Ahmed b. Musa.