Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 239 Hüküm no: 388 Orijinal metin no: [57a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaçak kölenin satılması Sebeb-i tahrîr-i sicil budur ki Hasan, gendüm-gûn, ganemü’l-ayneyn, efraku’l-hâcibeyn, mütevassıtu’l-kāme, başında sarı külâh ve eğininde bir köhne âsumânî yeniçeri çukası ve ayağında bir bağ bir abd-ı âbıkı tutup meclis-i şer‘de Üsküdar Emîni olan Timurhan’ın âdemisi Mustafa’ya teslîm eyleyip talebiyle sebt-i sicil olundu. Cerâ zâlike ve hurrire fî gurreti Ramazâni’l-mübârek sene 931. Şuhûdü’l-hâl: Kemal b. Mehmed, Tahir b. Hasan, Cafer b. Sultanşah, Mehmed b. Süleyman ve gayruhüm mine’l-müslimîn. Mezkûr [u] mevsûf abd-ı âbıkın müddet-i örfiyyesi tamâm olup mirâren mezâd olundukdan sonra mahrûse-i Kostantıniyye’de Sultan Mehmed mahallesinden ebnâ-i sipâhiyândan Mahmud Bey b. Abdullah’a bin yüz akçeye bey‘ olunup iki yüz akçe nafakasına ve doksan akçe ca‘lına ve elli akçe müjdegânesine ve on dört akçe iki sicillâta ve sekiz akçe dellâliyesine ve dört akçe bâcına harc olunup yedi yüz otuz akçe Timurhan’da emânet konulup sebt-i sicil olundu. Tahrîren fî evâsıtı Zilhicce sene 931. Şuhûdü’l-hâl: Mahmud Çelebi b. Umur, Hacı Halil b. Umur, Hacı Süleyman b. Ahmed, Mehmed b. Abdullah ve gayruhüm.