|
Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 241 Hüküm no: 394 Orijinal metin no: [58a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Rus asıllı kaçak kölenin sahibine teslim edilmesi
Vech-i tezkiretü’l-hurûf budur ki Nefs-i Üsküdar’da Hızır b. Karaca meclis-i şer‘de asferü’l-levn, azraku’l-ayneyn, eflecü’l-hâcibeyn, evsatu’l-kāme, Rûsiyyü’l-asl Atmaca b. Abdullah abd-ı âbıkı tutup Receb ayının on beşinde Timurhan b. İsmail’e teslîm olunup nafakası ve hıfzı için yevmî ikişer akçe takdîr olundu. Tahrîren fî evâsıtı Recebi’l-mürecceb sene 930.
Şuhûdü’l-hâl: Mevlâna Kerim b. Şeyh İbrahim, Hasan b. Timur, Hacı b. Timurhan ve kâtibü’l-hurûf ve gayruhüm mine’l-hâzırîn. Mezkûr [u] mevsûf abd-ı âbıkın sâhibi sipâhiyan zümresinden kazâ-i İznikmid’den karye-i İğdir’den İlyas Bey nâm kimesne imiş, teslîm olundu. Tahrîren fî şehri Recebi’l-mürecceb.
Şuhûdü’l-hâl: Mehmed b. Memi, Karagöz Bekir b. Abdullah, İlyas Çelebi b. Hayreddin.
|