Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 259 Hüküm no: 440 Orijinal metin no: [62b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaçak Arap kölenin satılması Vech-i tahrîr-i sicil budur ki Yeniçeriyân zümresinden Şücâ‘ b. Abdullah meclis-i şer‘a bir arap abd-ı âbık ki başına sarı külâh ve eğinine köhne âsumânî çuka ve ayağına kurt ağzı pabuç giyer gurre-i Şa‘bânın dokuzunda getirip Üsküdar Emîni âdemisi Mustafa b. Abdullah’a teslîm olunup nafakası ve hıfzı için yevmî iki akçe takdîr olundu. Tahrîren fî evâili Şa‘bâni’l-mu‘azzam sene 931. Şuhûdü’l-hâl: Pîri Bey b. Pîr Aziz, Mehmed b. Kıyamet, Ali b. Musa ve gayruhüm. Mezkûr [u] mevsûf abd-ı âbıkın müddet-i örfiyyesi tamâm olup bezzâzistanda mirâren mezâd olunup dokuz yüz akçeye Ali Paşa mahallesinde mütevattın Mustafa Fakih’e bey‘ olundukdan sonra iki yüz akçe nafakasına ve elli akçe müjdegânesine ve on dört akçe iki sicillâta ve on akçe dellâliye ve dört akçe bâcına verilip bâkī altı yüz yirmi akçe Üsküdar Emîni Timurhan’da emânet konulup sebt-i sicil olundu. Tahrîren fî 27 Zilka‘de sene 930. Şuhûdü’l-hâl: Mevlâna Ahmed Çelebi b. merhûm Sıyâmi, İvaz b. Mehmed, Süleyman b. Yusuf ve gayruhüm.