Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 293 Hüküm no: 521 Orijinal metin no: [78a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Efrenc asıllı kaçak kölenin sahibine teslim edilmesi Vech-i tahrîr-i sicil budur ki Timurhan b. İsmail şer‘-i şerîf meclisine gendüm-gûnü’ş-şekl, müttasılü’l-hâcibeyn, esvedü’l-ayneyn, kāimü’l-enf, tavîlü’l-kāme, başına kızıl yelken takye ve eğinine ak İmroz kebesi ve ak kepenek ve ak benevrek Efrenciyyü’l-asl Sakızî abd-ı âbıkı tutup kendiye teslîm olunup ve nafakası ve hıfzı için yevmî iki akçe takdîr olunup sebt-i sicil olundu. Tahrîren fi’l-yevmi’s-sâbi‘ min Muharremi’l-harâm sene erba‘ ve selâsîne ve tis‘a mi’e. Şuhûdü’l-hâl: İbrahim b. Gündüz, İbrahim b. Abdullah, Pîri b. Hızır, Şaban Halife el-imâm . Mezkûr [u] mevsûf abd-ı âbıkın sâhibi Kara Hamid Bey’i Hüsrev Paşa-yef‘alullâhü mâ-yeşâ-nın kethudâsı Sinan Bey nâm kimesnenin olup hızmetkârı Sinan b. Abdullah ile ve mezkûr kethudânın birâderi Ali nâm kimesneye teslîm olunup sebt-i sicil olundu. Tahrîren fi’l-yevmi’l-âşir min şehri Muharremi’l-harâm sene erba‘ ve selâsîne ve tis‘a mi’e. Şuhûdü’l-hâl: Mütevellî Süheyl b. Abdullah, Şaban Halife b. Ramazan, İbrahim b. Abdullah, Şücâ‘ b. İdris, Mevlâna Lütfi Fakih b. Merhûm İsa Fakih ve gayruhüm.