Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 294 Hüküm no: 524 Orijinal metin no: [79a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaçak kölenin satılması Vech-i tahrîr-i sicil budur ki Çavuş Hayreddin hızmetkârı Mustafa b. Abdullah meclis-i şer‘a kara yağız ve elâ gözlü çatık kaşlı kösecü’ş-şekl orta boylu başına köhne keçe takye ve eğinine boz aba ve ayağına çarık giyer abd-ı âbıkı tutup nafakası ve hıfzı için yevmî iki akçe takdîr olunup sebt-i sicil olundu. Tahrîren fi’l-yevmi’s-sâmin min şehri Muharremi’l-harâm sene 934. Şuhûdü’l-hâl: İbrahim b. Abdullah, Nazar b. Yahşi, Burhan b. Hasan ve gayruhüm Mezkûr [u] mevsûf abd-ı âbıkın müddet-i örfiyyesi tamâm olup mirâren mezâd olunup karye-i İstavros nâzırı olan Sinan b. Abdullah’a sekiz yüz altmış akçeye bey‘ olundukda iki yüz akçe nafakasına ve doksan akçe ca‘lına ve elli akçe müjdegânesine ve yirmialtı akçe bir hüccete ve sekiz akçe sicillâta ve altı akçe dellâliyesine cem‘an üç yüz seksen akçe harc olup bâkī dört yüz seksen beş akçe Çavuş Hayreddin’de emânet konulup sebt-i sicil olundu. Tahrîren fi’l-yevmi’s-sâmin ve’l-ışrîne sene 934. Şuhûdü’l-hâl: Berber Ahmed b. Musa, Bâli b. Aslıhan ve gayruhüm mine’l-hâzırîn.