Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 344 Hüküm no: 650 Orijinal metin no: [105a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Selman Ağa Mescidi’ne para vakfedilmesi ve Mevlâna Sinan Halife’nin mütevelli tayin edilmesi Vech-i tahrîr-i sicil budur ki Mevlâna Sinan Halife b. Evhad meclis-i şer‘-i şerîfe Kemal b. Hoşkadem nâm kimesneyi ihzâr edip üzerine şöyle takrîr-i müdde‘â kılıp eyitti ki, atyeb-i iktisâbından ahlas-ı emvâlinden dört bin akçe vakf edip beni mütevellî nasb edip on akçesin on bir akçe ikişer pula mu‘âmele-i şer‘iyye olunup her kim Selman Ağa mescidine müezzin olursa yevmî bir aşir okuyup günde bir akçe ala ve her kim Selman Ağa vakfına mütevellî ola, tevliyet ona meşrût olsun dedi. Ve nâzır olup yılda mütevellî elli akçe alıp ve nâzır otuz akçe alsın. Ve yirmi akçe dahi muhzırlar alıp akçe tahsîl etmek lâzım olıcak ihzâriye almayıp alıvereler. Ve kırk akçe dahi Davud Paşa imâretine konan müsâfirlere, kırk akçe mum alıp lâzım oldukça vereler vefâ edince, deyicek merkūm Kemal bi’l-mukābele inkâr edicek sıdk-ı da‘vâsına muvâfık beyyine taleb olunıcak udûl-i müslimînden Mevlâna Şaban Halife b. Ramazan ve Ali Bâli b. Kulağuz vech-i meşrûh üzere müttefiku’l-lafz ve’l-ma‘nâ şehâdet-i şer‘iyye kıldıklarından bade’t-ta‘dîl ve’t-tezkiye hayyiz-i kabûlde vâkı‘ olduktan sonra e’imme-i müctehidînden dirhemin ve denânîrin vakfiyyetin câiz görenlerin kavli üzere sıhhat-ı vakfa ve lüzûmuna hükm olundu. Hükmen sahîhan şer‘iyyen meblağ-ı mezkûrdan bin akçe merkūm Sinan Halife’ye bî-kusûr teslîm olunup sebt-i sicil olundu. Tahrîren fî evâili Cemâziyelevvel min şuhûri sene ihdâ ve selâsîne ve tis‘a mi’e. Şuhûdü’l-hâl: Mevlâna Süleyman Halife b. Ece Halife, İbrahim b. Gündüz, Kulağuz b. Aslıhan, Hızır b. Abdullah, Mahmud b. İshak, Hızır b. Ahmed, Hoca Abdullah b. Yahşi, Hasan b. Ramazan, Ali b. Hasan ve gayruhüm mine’l-müslimîn