Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 353 Hüküm no: 674 Orijinal metin no: [108a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mustafa b. İsa’nın Selman Ağa Vakfı’na para vakfetmesi Vech-i tahrîr-i sicil budur ki Merhûm Selman Ağa mütevellîsi olan Süheyl b. Abdullah meclis-i şer‘de kasaba-i Üsküdar’dan Davud Paşa mahallesinden Hacı Mustafa b. İsa mahzarında şöyle takrîr-i kelâm kılıp eyitti ki, mezkûr Hacı Mustafa atyeb-i emvâlinden dört bin akçe ifrâz eyleyip beni mütevellî ta‘yîn edip şart eyledi ki, her on akçesi, on bir akçe üzere istirbâh oldukda sene-i kâmilde dört yüz akçe hâsıl olur, zikr olunan dört yüz akçeden ma‘rifet-i mütevellî ile Selman Ağa mescidinde her kim müezzin olup kābil-i kırâet her subh vaktinde ba‘de salâti’l-fecr kelâm-ı kadîmden alâ-vechi’l-mushafi’ş-şerîf bir aşir kırâet eyleyip sevâbın bana hibe eyleye. Mukābele-i kırâete her ayda yirmi beşer akçe verildiği takdîrce sene-i kâmilede üç yüz akçeye mutasarrıf ola. Bâkī kalan yüz akçenin kırk akçesine iki bal mumu alınıp berâtı vaktinde, birisi Davud câmi‘inde ihrâk oluna ve birisi Selman Ağa mescidinde ihrâk oluna. Ve kırk akçe dahi cihet-i tevliyet için sarf oluna. Ve beş akçesine her sene birisine yağ mumu alına kırâet-i aşir için. Ve beş akçe cihet-i nezâret ola, her senede mutasarrıf ola. Ve bâkī kalan on akçe dahi muhzır hâcet oldukda harc-ı ma‘kūl olup sarf oluna diye şart eyledi, dedikde sâlifü’z-zikr Hacı Mustafa inkâr birle cevâb vericek udûl-i müslimînden mütevellî-i mezbûr da‘vâ-yı meşrûhası üzere Hacı Ali, Bâli b. Kulağuz ve Hacı Hüseyin b. Kulağuz şehâdet-i şer‘iyye eyledikleri ba‘de’t-tezkiye ve’t-tahlîf hayyiz-i kabûlde vâkı‘ olup vakfiyyetine hükm olunup sebt-i sicil olundu. Tahrîren fî gurreti Muharremi’l-harâm sene erba‘ ve selâsîne ve tis‘a mi’e. Şuhûdü’l-hâl: İbrahim b. Abdullah, Dolabî Musa b. İbrahim, Şaban Halife b. Ramazan, Nazar b. Yahşi, Hacı Habbâz b. Yusuf, Pîri b. Hızır ve kâtibü’l-hurûf İsa Nâib ve gayruhüm mine’l-müslimîn ve cemâ‘atü’l-hâzirîn