Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 75 Hüküm no: 16 Orijinal metin no: [2a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Peline köyünün vergi gelirlerinin Dimitri b. Manol’e mukataaya verildiği Sebeb-i tahrîr-i sicil budur ki Merhûm [ve] mağfûrun-leh Sultan Yıldırım Hân -aleyhi’r-rahmetü ve’l-gufrân- Mahrûse-i [İstanbul’da] vâkī‘ olan İmâret-i âmiresi evkāfından Gekvize kazâsında Peline nâm karyenin öşr-i şırasını ve öşr-i hubûbât ve resm-i çift ve bennâk ve resm-i zemîn-i âsiyâb ve beytülmâl ve [r]esm-i arûsâne ve resm-i güvâre ve bâd-ı havâ ve memleha ve mahsûl-i iskele ve bir bâb su değirmeni ve bir çiftlik-i hâssa yer ve dalyan adası öşrünü ve abd-i âbık sâir yavasını ve kışlasını ve bir büyük dalyan ve iki küçük dalyan ve bi’l-cümle cizye ve ispençeden gayrı üç yıla üç hâsılını sene ihdâ ve erba‘în ve tis‘a mi’e Cemâziyelevvel’i gurresinden yüz yirmi beş bin iki yüz elli akçeye üç ayda bir yevmü’l-kıst cevânib vermek üzre mukāta‘aya işbu sâhibü’s-sicil Dimitri b. Manol zimmî[ye] ziyâde kendinin olmak kavli üzre verdim deyû karye-i mezbûra câbi olan Hüseyin ikrâr ettikden sonra mezbûr Dimitri tasdîk edip sicil olundu. Ba‘de’l-yevm ber mûceb-i kānûn-ı münîf zabt edip işbu sâhibü’s-sicil Dimitri her mahsûlü mevsiminde edâ etmesine mültezim olup sicil olundu. Tahrîren fî evâili Zilhicce sene 941. Şuhûdü’l-hâl: Pîrî Halîfe b. Üveys ve Usta İbrahim el-Hayyât ve Dede b. Hasan ve kâtibü’l-hurûf Abdülkād[ir] ve gayruhüm.