Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 90 Hüküm no: 64 Orijinal metin no: [7b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kayıp koyunların Hacı b. Abdullah’a ait olduğu Sebeb-i tahrîr-i hurûf oldur ki Karye-i Ner[dü]banlı’dan Hacı b. Abdullah ve Şaban b. Halil ile şer‘-i şerîf meclisine hâzırân olup mezbûr Hacı takrîr-i merâm kılıp Sefer Çelebi koyuniyle mahlût yetmiş dokuz re’s koyun Fermak nâm zimmî çobanım iken merkūm Fermak âhar yere maslahata gidecek zikr olan yetmiş dokuz re’s koyun mâl-ı gāibdir deyû emîn-i mezbûr Şaban zabt etmiş bi hasebi’ş-şer‘ taleb ederim deyicek emîn-i mesfûr Şaban bi’l-mukābele istifsâr olundukda cevâb verip dedi ki zikr olan yetmiş dokuz re’s mersûm Hacı’nın idiğini inkâr edicek udûl-i müslimînden Yusuf b. Mahmud ve Ali b. Şâhin li ecli’ş-şehâde meclis-i şer‘de hâzırân olup zikr olan yetmiş dokuz re’s koyun ki emîn Şaban mâl-ı gāib deyû kabz ettiği mesfûr Hacı’nın mülk koyunudur deyû şâhidleriz şehâdet dahi ederiz dediklerinden sonra şehâdetleri ba‘de’t-tezkiyyeti’ş-şer‘î ve’t-tahlîfi’l-âdî hayyiz-i kabûlde vâkī‘ oldukdan sonra yetmiş dokuz re’s koyun merkūm Hacı’ya hükm olunup deftere kayd olundu. Tahrîren fî evâsıtı Zilhicce sene 940. Şuhûdü’l-hâl: Şaban b. Mustafa ve diğer Şaban b. Abdullah ve Ramazan b. Memi ve Sefer Çelebi b. Mustafa ve gayruhüm mine’l-hâzırîn.