Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 98 Hüküm no: 88 Orijinal metin no: [10b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Süleyman b. Abdi’nin para vakfettiği Sebeb-i tahrîr-i sicil budur ki El-Hacı Süleyman b. Abdi şer‘-i şerîf-i Nebevî meclisine karındaşı Hasan b. Abdi ile hâzırân olup mezbûr Hasan takrîr-i merâm kılıp eyitdi ki işbu Hacı Süleyman etyab-ı emvâlinden râyicü’l-vakt dört bin akçe ihrâc eyleyip vakf eyledi ve dahi beni mütevellî nasb edip zikr olan dört bin akçeyi bana teslîm eyledi ve meblağ-ı merkūmun her yüz akçesi on bir akçe ve iki pul üzre mu‘âmele-i şer‘iyye olsun ve meblağ-ı mezbûrun ribhinden üç yüz altmış akçesine kendi mescidine her kim müezzin olursa her sabâh Kelâm-ı Kadîm’den yevmî bir cüz’ kırâ’at edip zikr olan üç yüz altmış akçe ana verile ve her senede dahi mütevellî olan kimesne meblağ-ı mezkûrun ribhinden seksen akçe alsın ve bâkī kalan altmış akçeyi mescid-i [mez]bûrun meremmeti için ta‘yîn edip ve benden sonra mütevellî her kim mescid-i merkūma imâm olursa ol ola deyip bu zikr olan tarîk üzre şart eyledi deyicek mezbûr Hacı Süleyman’dan su’âl olıcak inkâr eyledi gıbbe’l-inkâr mesfûr mütevellî olan Hasan’dan alâ mâ idde‘â beyyine taleb olundu udûl-i müslimînden Ali Fakīh ibnü’l-Hacı Mehmed ve Beşir Halîfe b. Hüsam mersûm Hasan’ın da‘vâsına mutâbıku’l-lâfz ve’l-ma‘nâ şehâdet-i şer‘iyye ettiklerinden sonra ba‘de’t-tezkiyyeti’ş-şer‘î ve’t-tahlîfi’l-âdî mezkûrların şehâdetleri hayyiz-i kabûlde vâkī‘ olup sıhhat-i vakfa alâ kavli men-yerâhü hükm olundu. Hükmen sahîhan şer‘iyyen ve sarîhan mer‘îyyen ve ba‘de’t-taleb ve’s-su’âl tescîl olundu. Tahrîren fî evâili Muharremi’l-harâm sene 941. Şuhûdü’l-hâl: Şaban b. Ali ve İbrahim b. Gündüz ve Ali b. Kemal ve Memi b. Süleyman ve Hoca Abdullah b. Bahşî ve gayruhüm.