Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 121 Hüküm no: 161 Orijinal metin no: [19a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yakalandıktan sonra tekrar kaçan dört kölenin kaçmasında Kadıköy âmillerinin kusurlarının bulunmadığı Sebeb-i tahrîr-i sicil budur ki Karye-i Kadı’ya ber vech-i maktû‘ mübâşir olan Mahmud b. Mehmed ve Dimitri nâm âmiller şer‘-i şerîf meclisinde takrîr-i merâm kılıp eyitdiler ki hapsimizde olan üç nefer abd-i âbık ve bir siyah âbık Arap mahbesimiz bozup zinciri helâk eyleyip tomruk kilidin harâb edip ve bilekçekeleri helâk eyleyip mezkûr kullar gaybet eylediler bu husûsda taksîrâtımız yoktur dediklerinden sonra udûl-i müslimînden Hacı Bey b. Abdullah ve Şaban b. Abdullah ve Musa b. [boş] ve Mustafa Çelebi b. Hacı ve Süleyman nâm kimesneler ol hapishâne üzerine varıp mezkûr âmillerin takrîrlerine mutâbık şehâdet eylediklerinden sonra merkūmların şehâdetleri hayyiz-i kabûlde vâkī‘ olup şol ki vâkī‘-i hâldir vukū[‘u] üzre mezbûrân Mahmud ve Dimitri talebleri ile tescîl olundu. Şuhûdü’l-hâl: Yakub Fakīh b. Abdullah ve Hüsrev b. Yakub Fakīh ve Dede b. Hasan ve gayruhüm