Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 204 Hüküm no: 440 Orijinal metin no: [52a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İskender b. Abdullah’ın ölen Nikola’ya ait koyunları Yani’den istediği Sebeb-i tahrîr-i sicil budur ki Karye-i Kartal’dan Odacı Yani nâm zimmî ile çavuş Hayreddin âdem[i] olan İskender b. Abdullah şer‘-i şerîf meclisine hâzırân olup mezbûr İskender takrîr-i kelâm kılıp eyitdi ki fevt olan yava Nikola’nın muhallefâtı bize müteveccih oldukdan sonra mezbûr Nikola’nın altmış dört aded koyunu müşârün-ileyh Odacı Yani’nin koyunundadır elân taleb ederim deyicek müşârün-ileyh Odacı Yani’den su’âl olundukda cevâb verip eyitdi ki fevt olan Nikola’nın altmış dört aded koyunu karye-i Kadı’dan Yani zimmî sirkat edip getirip benim koyunuma halt eyledi deyû bi’t-tav‘ ve’r-rızâ ikrâr ve i‘tirâf edip ikrârını mezbûr İskender talebiyle tescîl olundu. Şuhûdü’l-hâl: Subaşı Mahmud b. Abdullah ve Lazari b. Yorgi ve İstati b. Manol ve Andon b. Todora ve Yorgi b. Manol ve Ali b. Musa ve gayruhüm.