Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 240 Hüküm no: 558 Orijinal metin no: [65b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim’in elinde bulunan kölenin Hatun Paşa bt. Ahmed’e ait olduğu Sebeb-i tahrîr-i sicil budur ki Mahrûse-i Bursa’da Şeyh Ebû İshak Mesci[di]’nde imâm olan müteveffâ Ali Halîfe b. Said nâm kimesnenin vasî-і muhtâre zevcesi Hâtun Paşa bt. Ahmed’in vekîli olan Mevlânâ Nasrullah b. Mehmed el-İmâm nâhiye-i Taşköprü’den İbrahim’in sâbitü’l-vekâle vekîli olan Süleyman b. Mehmed ile şer‘-i şerîf-i Nebevî ve Dîvân-ı lâtîf-i Ahmedî meclisinde hâzırân [olup] merkūm Nasrullah şöyle takrîr-i merâm kılıp eyitdi ki merhûm Ali Halîfe’nin işbu asferü’l-levn el-mütevassıtü’l-kāme Bosneviyyü’l-asl Yusuf b. Abdullah nâm mülk kulu zâyi‘ olup hâliyâ mersûm Süleyman’ın müvekkili mezkûr İbrahim elinde bulundu müvekkilim için taleb ederim deyicek gıbbe’l-inkâr müşârün-ileyh Nasrullah’tan alâ sıdkı da‘vâ beyyine taleb olundukda mahrûse-i mezbûrede mahalle-i Yıldırım’dan Ali b. Hamza ve Hüseyin b. Ali mezkûr Nasrullah’ın da‘vâsına mutâbıku’l-lâfz ve’l-ma‘nâ şehâdet-i şer‘iyye kıldıklarından sonra ba‘de’t-tezkiyyeti’ş-şer‘î mezkûrların şehâdetleri hayyiz-i kabûlde vâkī‘ olup mezkûr kul mesfûr Nasrullah’a teslîm olunup ve ba‘de’t-taleb ve’s-su’âl mâ hüve’l-vâkī‘ bi’t-taleb tescîl olundu. Tahrîren fî evâili Zilhicce sene 941. Şuhûdü’l-hâl: Memi b. Süleyman ve Süleyman b. Mehmed ve İbrahim b. Ahmed ve Hüsrev b. Yakub ve gayruhüm.