Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 241 Hüküm no: 563 Orijinal metin no: [66a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haydar Bey b. Sinan ile Müstecib b. Hasan’ın öküz satışı davasında sulh oldukları Sebeb-i tahrîr-i sicil budur ki Haydar Bey b. Sinan nâm kimesne[ye] vekîl-i mutlak olan Kara Ali nâm ba‘de sübûti vekâletihi bi mâ hüve tarîki’s-sübût şer‘an şer‘-i şerîf meclisine hâzır gelip karye-i Nerdübanlı’dan mütemekkin olan Müstecib b. Hasan’ı ihzâr eyleyip şöyle takrîr-i da‘vâ kılıp eyitdi ki müvekkilim Haydar Bey nâm kimesnenin mezkûr Müstecib’de öküz bahâsından üç yüz akçesi vardır hâliyâ taleb ederim deyicek mezkûr Müstecib inkâr edip ba‘de’l-münâza‘ati’l-kesîr ve’l-muhâsameti’ş-şedîd muslihûn araya düşüp es-sulhu hayrun ile âmiller olup mezkûr Müstecib’den merkūm Haydar Bey’in vekîl-i mutlak[ı] olan Ali’ye yüz nakid akçe verilip mâbeynleri ibrâ ve iskāt olundu ve ba‘de’t-taleb ve’s-su’âl mâ hüve’l-vâkī‘ deftere kayd olundu. Tahrîren fî evâili Zilka‘de sene 941. Şuhûdü’l-hâl: Dede b. Hasan ve Hüsrev b. Yakub Fakīh ve Bâli b. Aslıhan ve Hızır b. Ahmed ve gayruhüm.