Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 277 Hüküm no: 675 Orijinal metin no: [79a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vasî Hüsam Bey ile muhallefat nazırı Mustafa’nın câriye davasından sulh oldukları Sebeb-i tahrîr-i sicil budur ki Ahmed Bey b. Abdullah’ın yetimleri cânibinden Hüsam Bey b. Abdullah mezbûr yetimlerin nâzır[ı] olan Minnet oğlu Mustafa mezbûr yetimlerin Gülendâm nâm câriyesiyle şer‘-i şerîf-i Nebevî meclisine hâzırûn olduklarında mezkûr Hüsam Bey şöyle takrîr-i da‘vâ kılıp eyitdi ki merhûm Ahmed Bey fevt oldukda mezbûre câriyeyi vasî ve nâzır muvâza‘a edip iki bin beş yüz akçe bahâlı câriyesini bin yedi yüz akçeye satıp mâl-ı yetime ziyâde gadr olunmuştur ve bey‘ dahi sahîh değildir hâliyâ câriyenin aynın taleb ederim deyicek mezbûre Gülendâm’dan ve nâzır olanın oğlu Mustafa’dan istifsâr olundukda bi’l-mukābele cevâb verip dediler ki merhûm Ahmed Bey fevt oldukda zikr olan câriye yetimlerine intikāl edip mezbûr yetimlere vasî olan Acem ve Kadı ma‘rifet[iy]le babam Minnet satın alıp müdebber edip babam fevt olup mezbûre Gülendâm âzâde oldu deyicek tak[rî]rine mutâbık beyyine taleb olundukda beyyine ikāmet etmek sadedinde iken muslihûn-ı müslimîn araya girip [es-]sulhu hayrun ile amel eyleyip bedel-i sulh mezbûre Gülendâm mezkûr Hüsam Bey b. Abdullah[’a] beş yüz nakid akçe verip meblağ-ı mezbûru Hüsam Bey dahi alıp kabûl [ve] kabz edip ben cemî‘ü’l-vücûh olan da‘vâmdan ve nizâ‘ımdan ferâgat eyledim deyicek da‘vâ edersem ınde’l-hükkâm nâ-mesmû‘ ola deyicek kaziyye mâ hüve’l-vâkī‘ tescîl olundu. Tahrîren fî evâsıtı Saferi’l-muzaffer li sene isnâ ve erba‘în ve tis‘a mi’e. Şuhûdü’l-hâl: Hatîb Mevlânâ İsâ b. Fazlullah, Hoca Abdullah b. Bahşî, Malkoç b. Hamza, Emir b. Çepni, Kılavuz b. Aslıhan, Mustafa b. Mehmed, Hızır b. Mehmed ve Ali Bey b. Musa ve gayruhüm.