Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 289 Hüküm no: 707 Orijinal metin no: [83b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emir b. Çepni’nin Hüseyin b. Abdullah ile at bedelinden herhangi bir alacak vereceklerinin olmadığı Sebeb-i tahrîr-i sicil budur ki Çepni[’yi] mahfil-i şer‘a Hüseyin b. Abdullah ihzâr edip üzerine takrîr-i da‘vâ kılıp dedi ki mezkûr Çepni[’ye] üç yüz akçeye bir at sattım akçem taleb ederim deyicek mezkûr Çepni’den istifsâr olundukda bi’l-mukābele cevâb verip dedi ki mezkûrdan at aldım amma verdim haklaştım bir akçe borcum yoktur mezkûr Hüseyin[’in] aldım haklaştım mezkûr Çepni’de at bahâsından bir akçe alımım kalmadı dediğine şâhidlerim vardır deyicek udûl-i müslimînden Şaban b. Turud Seyyid İbrahim b. Yusuf şehâdetleri ile sâbit olup sicil olundu. Tahrîren fî evâili Muharremi’l-harâm li sene isnâ ve erba‘în ve tis‘a mi’e. Şuhûdü’l-hâl: Ali b. Musa, Hızır b. Ahmed, Mevlânâ Ramazan b. Ahmed ve kâtibü’l-hurûf.