Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 302 Hüküm no: 742 Orijinal metin no: [90a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta b. Bostancı’nın Manol b. Andriye’den satın aldığı evin parasını sâlyân olunan kişilere ödediği (bey‘-i kat‘) Sebeb-i tahrîr-i sicil budur ki Karye-i İstavros’dan Manol b. Andriye ve Kosta b. Bostancı şer‘-i şerîfe hâzırân olup bilelerince Ali Çelebi b. Emir[’i] ihzâr edip mezkûr Manol bi’l-mukābele ikrâr ve i‘tirâf kılıp dedi ki bundan akdem karye-i mezbûrdan bir mülk evimi mezkûr Kosta[’ya] iki [bin] yüz akçeye bey‘-i kat‘la bey‘ edip semen-i mezbûrun bin akçesini Hamza Bâli b. Abdullah[’a] sâlyân ettim ve bin elli akçesini dahi bundan akdem Ali Çelebi b. Emir’e karz-ı hasenden beş yüz akçe deynim vardır ve Vasil nâm zimmîye beş yüz akçeye kefîl bi’l-mâl olduğumdan deynim olup meblağ-ı mezbûrun bin elli akçesin dahi müşârün-ileyh Ali’ye dahi sâlyân ettim deyicek mezbûr Ali Çelebi ve Hamza Bâli dahi Kosta’dan olan sâlyân[ı] kabûl ettik deyû ikrâr eylediklerinden sonra mezbûr Kosta dahi zimmetinde olan ev bahâsından iki [bin] yüz akçeyi sâlyân olan yerlere vermeye mültezim olup hisseleri mâ hüve’l-vâkī‘ talebleriyle tescîl olundu. Tahrîren fî evâsıtı Rebi‘ilevvel. Mezkûr Kosta mezkûr Ali’ye yüz otuz dört akçe kafta[n] bahâsından deynim vardır deyû ikrâr sicil olundu. Tahrîren fî evâsıtı Rebi‘ilevvel sene 942. Şuhûdü’l-hâl: Karaca b. Sarıca, Oruc b. Deniz, Mevlânâ Ramazan b. Ahmed ve Mustafa b. Sinan ve gayruhüm.