Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 303 Hüküm no: 744 Orijinal metin no: [90b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâlci İskender’in elindeki kaçak kölenin Şaban’a ait olduğu Sebeb-i tahrîr-i sicil budur ki Beypazarı kazâsından nefs-i Beypazarı’ndan Yakacık mahallesinden Şaban mahfil-i şer‘a hâzır gelip bilesine yava ve beytülmâl zâbit[i] olan İskender b. Abdullah[’ı] ihzâr edip üzerine takrîr-i da‘vâ kılıp dedi ki bir kulum ibâkat eyledi hâliyâ senin elinde buldum taleb ederim deyicek mezkûr İskender bi’l-mukābele cevâb verip dedi ki zikr olan kul senin idiği neden ma‘lûmdur deyicek mezkûr Şaban’ın takrîrine muvâfık beyyine taleb olundu. Udûl-i müslimînden Ahmed b. Musa ve Yunus b. Süleyman şehâdet için hâzırân olup şöyle edâ-i şehâdet-i şer‘iyye kılıp dediler ki biz şâhidleriz ve şehâdet dahi ederiz ki işbu mezkûr İskender’in elinde münâza‘at kayd olan mezkûr Şaban’ın mülk kuludur elân dahi mülkdeyken ibâkat eylemiştir deyicek şâhidân-ı mezbûrânın şehâdetleri ba‘de’t-tezkiyyeti’ş-şer‘î ve’t-tahlîfi’l-âdî hayyiz-i kabûlde vâkī‘ oldukda zikr olan kul mezkûr Şaban’a hükm olunup ve mezkûr Şaban’ın nefsine dahi mezkûr Yunus b. Süleyman ve Ebâ Eyyûb-i Ensârî kurbunda Çavuş Mescid mahallesinde Mustafa b. Ahmed kefîl bi’n-nefs olup kaziyye mâ hüve’l-vâkī‘ sicil olundu. Tahrîren fî evâhiri Rebi‘ilevvel li sene isnâ ve erba‘în ve tis‘a mi’e. Şuhûdü’l-hâl: Mevlânâ Ramazan b. Ahmed ve Şaban b. Evhad ve Mustafa b. Mehmed ve kâtibü’l-hurûf Mahmud ve gayruhüm.