Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 325 Hüküm no: 812 Orijinal metin no: [99a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Huri Kadın bt. Hamza’nın Şeyh Mustafa Çelebi’den alacağının tahsili için Musa b. Mehmed’i vekil tayin ettiği Sebeb-i tahrîr-i sicil budur ki Musa b. Mehmed meclis-i şer‘a gelip takrîr-i merâm kılıp dedi ki bundan akdem Huri Kadın bt. Hamza beni bundan akdem Gekvize’de Şeyh Mustafa Çelebi zimmetinde olan üç bin akçenin kabzına ve da‘vâsına beni vekîl eyledi deyicek takrîrine muvâfık beyyine taleb olundu udûl-i müslimînden Ali b. Abdullah el-Hacı Hamza b. Abdullah şehâdet için hâzırân olup edâ-i şehâdet edip dediler ki biz şâhidleriz ve şehâdet dahi ederiz mezbûre Huri Kadın bt. Hamza mezbûr Musa b. Mehmed’i merhûm Şeyh Mustafa Çelebi zimmetinde olan üç bin akçenin kabzına ve da‘vâsına vekîl eyledi elân dahi meblağ-ı mezbûr merhûmun zimmetindedir deyicek şâhidân-ı mezbûrânın şehâdetleri hayyiz-i kabûlde vâkī‘ olup sicil olundu. Tahrîren fî evâili Rebi‘ilâhir li sene isnâ ve erba‘în ve tis‘a mi’e. Şuhûdü’l-hâl: Hızır b. Ahmed ve Ramazan Halîfe b. Ahmed ve Hacı Süleyman b. Abdi ve gayruhüm.