Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 336 Hüküm no: 843 Orijinal metin no: [103b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstati b. Manol’ün ortağı Lazari’den içki bedelinden alacaklı olduğu Sebeb-i tahrîr-i sicil budur ki İstati b. Manol nâm zimmî meclis-i şer‘a gelip bilesine karye-і Kadı’dan Lazari nâm zimmî ihzâr edip üzerine takrîr-i da‘vâ kılıp dedi ki bundan akdem mezkûr Lazari ile iştirâk meyhâne tutmuştuk hâliyâ iki bin dört yüz akçelik hamr gāib edip fâ’ideyi almadan emr-і pâdişâhiyle bizi öte yakaya sürdüler bana müteveccih olan hisseden bin iki yüz akçelik hamr senin zimmetinde kaldı hâliyâ taleb ederim deyicek mezkûr Lazari bi’l-mukābele bu ma‘nâyı inkâr eyledi gıbbe’l-inkâr müdde‘î-і mezbûrun da‘vâsına muvâfık beyyine taleb olundu udûl-і müslimînden Memi b. Koca ve Mustafa b. ( ) şehâdet-і şer‘iyye kılıp dediler ki biz şâhidleriz ve şehâdet dahi ederiz ki bundan esbak mezkûr Lazari iştirâk olduğumuz meyhâneden hamr bahâsından bin iki yüz akçesi benim zimmetimde mezkûru sürdüler bende kaldı dedi deyicek şâhidân-ı mezbûrânın şehâdetleri ba‘de’t-tezkiyyeti’ş-şer‘î ve’t-tahlîfi’l-âdî hayyiz-і kabûlde vâkī‘ olup kaziyye mâ hüve’l-vâkī‘ sicil olundu. Tahrîren fî evâhiri Rebi‘ilâhir li sene isnâ ve erba‘în ve tis‘a mi’e. Şuhûdü’l-hâl: Mustafa b. Abdullah, Turgud b. Murad ve Ramazan b. Ahmed ve Ali b. Musa ve Bâli b. Aslıhan ve kâtibü’l-hurûf ve gayruhüm.