Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 351 Hüküm no: 882 Orijinal metin no: [110a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emir b. Mustafa’nın Kürkçü Yani’den alacaklı olduğu iddiası Vech-i kaziyye budur ki Emir b. Mustafa meclis-i şer‘a gelip bilesine karye-i İstavros’dan Kürkçü Yani b. Yorgi ihzâr edip üzerine takrîr-i da‘vâ kılıp dedi ki karz-ı hasenden mezkûr Kürkçü Yani’de üç bin akçem vardır hâliyâ taleb ederim deyicek mezkûr Kürkçü Yani’den istifsâr olundukda bi’l-mukābele cevâb verip dedi ki ne‘am var idi amma verdim haklaştım şâhidlerim vardır deyicek üç güne mühlet-і şer‘î verilip sicil olundu. Tahrîren fî yevmi şenbe. Tahrîr-i def‘a mezbûr Kürkçü Yani meblağ-ı mezbûru mezbûr Emir b. Mustafa’ya vereli altı gündür deyicek ikrâr sicil olundu. Tahrîren fî evâhiri Cemâziyelevvel sene isnâ ve erba‘în ve tis‘a mi’e. Şuhûdü’l-hâl: Mustafa b. Sinan, Ramazan Reis b. Hasan ve Ali b. Musa ve Ramazan Halîfe b. Ahmed ve kâtibü’l-hurûf.