Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 363 Hüküm no: 908 Orijinal metin no: [113b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Davud b. Sungur’un Suvadino b. Yorgi’ye ayıplı öküz sattığı Sicill-і Suvadino ve Dâvud Sebeb-i tahrîr-i sicil budur ki Suvadino b. Yorgi meclis-i şer‘a gelip bilesine Kalgallı’dan Dâvud b. Sungur’u ihzâr edip üzerine takrîr-i da‘vâ kılıp dedi ki bundan akdem mezkûr Dâvud’dan iki yüz altmış akçeye bir camus öküzü almıştım hâliyâ çifte koştum yürümez ve kağnıya koştum anda dahi yürümez hâliyâ bana hayftır deyicek mezkûr Dâvud’dan istifsâr olundukda bi’l-mukābele cevâb verip dedi ki mezkûr camus öküzünü mezkûr Suvadino[’ya] küllî ayıbıyla bey‘ eyledim deyicek takrîrine muvâfık beyyine taleb olundukda beyyineden âciz ve kāsir olıcak mezkûr Suvadino mezkûr öküzün ayıb[ın] bilip kabûl eylemediğine yemîn verilip zikr olan camus öküz mezkûr Dâvud üzerine redd olunup sicil olundu. Tahrîren fî evâsıtı Cemâziyelâhir sene 942. Şuhûdü’l-hâl: Utbe b. Abdullah ve Kāsım b. Abdullah ve kâtibü’l-hurûf.