Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 107 Hüküm no: 103 Orijinal metin no: [16b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Köyün mukâtaa ve tımar sahibinin kaçak kölenin satış parasını paylaştığı Vech-i tahrîr-i sicil budur ki Merhûm ve mağfûrun-leh Sultân Selîm evkāfından karyeti Kadı cibâyetini sene ihdâ ve hamsîne ve tis‘a mi’e Zilhiccesi evâsıtında duhûl eden Mart ibtidâsından ilâ tamâmı seneti kâmile varınca bir seneyi altmış iki bin akçeye mukāta‘aya alan Ramazan b. Hamza ve fahrü’l-emâsîl ve’l-akrân çavuş Hayreddin b. Mustafa kıbelinden sâbitü’l-vekâle vekîl olan Hızır b. Ahmed meclis-i şer‘a hâzırân olduklarında mezbûr Ramazan takrîr-i da‘vâ kılıp eyitdi ki mukāta‘aya aldığım vakıf karyeler içinde haps olunan âbıkın bey‘i benimdir deyû dahl edip üç bin beş yüz akçe aldık dedikde mezbûr Hızır dahi benim müvekkilim Çavuş’un timarıdır vakfın içinde haps olunan âbıkdan üç bin beş yüz akçe aldım deyip ikrâr bi’t-taleb sicil olundu. Vaka‘a’t-tahrîr fî evâili Şa‘bân sene 953. Şuhûdü’l-hâl: Ahmed Çelebi b. Hasan, Mustafa b. Mehmed, Ramazan b. Hüseyin, Mahmud b. Mehmed.