Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 158 Hüküm no: 265 Orijinal metin no: [38b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Boş arazinin Sipahi Mehmed b. Ali ve Mehmed b. Halil’e tapuya verilmesi Vech-i tahrîr-i sicil budur ki Samandıra nâm karyeye hâliyâ berât-ı hümâyûn ile sipâhi olan Mehmed b. Ali ve Mehmed b. Halil nâm sipâhiler şerî‘at mahfilinde karye-i mezbûrdan Ali Fakīh b. Üveys nâm kimesne muvâcehesinde takrîr-i da‘vâ kılıp eyitdiler ki senin yerin kurbunda iki kıt‘a yer hâlîdir. Bir kıt‘anın hudûd şarken Ahmed hendeğine ve şimâlen tarîk-i âma ve garben mezbûr Ali Fakīh tarlasına ve kıbleten tarîk-i âma tahmînen İslâmbol kilesiyle on beş kilelik yerdir deyû ehl-i hibresiyle ve kıt‘a-i âharı ve üç taraf mezkûr Ali Fakīh tarlasına ve bir taraf kûhî ılgınlığa bu hudûd ile mahdûd olan yer tahmînen İslâmbol kilesiyle on kilelik yer vardır deyû ehl-i hibre haber verdiklerinde otuz yıldan beri hâlî yerdir zirâ‘ate ve hirâsete kābildir tapuya müstahak olduğu sebebden zikr olunan iki kıt‘a yer mezkûr sipâhilere hükm olundular bi’t-taleb sicil olundu. Vaka‘a’t-tahrîr fî evâili Safer sene 954. Şuhûdü’l-hâl: Ramazan b. Hızır, Hüseyin b. İsa, Mehmed b. Hasan, Hasan b. Karagöz, Hasan b. Abdullah, Ramazan b. Hüseyin.