Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 166 Hüküm no: 282 Orijinal metin no: [41b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Bahşî’nin atını çalma davasından Hasan b. Kaya’nın berat ettiği Vech-i tahrîr-i sicil budur ki Karye-i Samandıra’dan Ahmed b. Bahşî şerî‘at mahfilinde karye-i mezbûrdan Hasan b. Kaya muvâcehesinde takrîr-i da‘vâ kılıp eyitdi ki evim önünde bir atım dururken gece ile sirkat olunup, gittiğimde ardı sıra sürüp nâhiye-i Taşköprü’de karye-i Kırlı’da konup otururken Ali nâm hırsız yedinde buldum amma mezkûr hırsız dedi ki bana işbu atı Hasan b. Kaya verip çayırda otlatmak için deyû haber verdiği ecilden senden taleb ederim dedikde mezbûr Hasan inkâr ettikde gıbbe’l-inkâr mezbûr Ahmed’den beyyine taleb olunup âciz oldukda mezbûr Hasan’a yemîn billâh verilip ahâlî-i karyeden Ali Fakīh b. Üveys ve Ali b. Abdullah ve Kasım Bey b. Abdullah ve Hüseyin b. İsa, Murad b. Mehmed ve Musa b. İsâ [ve] Veliyyüddin Fakīh b. Şaban işbu seni biz iyi biliriz, iyidir ve iyiliğine şâhidleriz deyû haber verdiklerinde, mezbûr Hasan’ın husûs-ı kazıyyeden zimmetinin berâ’atine hükm olundu ki bi’t-taleb sicil olundu. Vaka‘a’t-tahrîr fî evâili Rebî‘ilevvel sene 954. Şuhûdü’l-hâl: Muhyiddin Halîfe b. Dâvud el-Hatîb, Yusuf b. Abdullah, Mustafa Çelebi b. Pîrî, Pîrî Çelebi b. Mehmed, Mehmed b. Ali, Ahmed b. Veliyyüddin, Nasûh b. Hamza, Veli b. Râcil, Latif Fakīh b. Ali Fakīh, Mustafa b. Süleyman, Temim Halîfe b. Hamza, Süleyman b. Ali, Mahmud b. Mehmed ve gayruhüm mine’l-hâzırîn.